Surat buat Bang Fauzi


Assalamu ‘alaikum Warohmatullahi Wabarokatuhu

Bang Fauzi,

Jakarta punya kita semua kan, Bang? Kota yang Abang pimpin mingkin keliatan gegap gempita. Bukan cuman gedung nyang nambah banyak dan numpuk di pusat, rumah-rumah bedeng juga numpuk noh di belakang proyek. Tumpek blek, Bang. Abang, kan nyang punya tangan buat ngatur yang namanye peraturan kan bang. Coba, Bang diatur lagi ini Kota. Itu peraturan soal emisi gas buang ditegakkin lagi dah, Bang. Ane ngeri Bang, Jakarta udah kaya pembantai bayi sekarang. Anak-anak tetangga ane pada megap-megap, Bang.

Kendaraan nambah terus ya Bang, padahal ruas jalan kagak bakal ditambah. Ntar Abang tambah jalan, pohon kena tebas. Ane yakin, ruas jalan Abang tambah juga jalanan kagak bakal kerasa lengang, Bang.

Nyatanye Jakarta sekarang isinye individualis, ane liat jelas di atas aspal hitam yang nomprokin Jakarta. Semuen orang buru-buru, semua orang mikirin diri sendiri aje. Nantinye, semuen orang kejebak di ujung botolnyang namanye macet total.

Bang, ude berapa taon ibukota begini? Lime taon? Sepuluh taon? Lime belas taon? Mingkin baek kagak? Boro-boro. Kejadiannye tambah ancur. Mobil mingkin banyak menuhin sisi-sisi jalan, motor juga mingkin yoi. Denger-denger, banyak OKB di ibukota. OKB yang kendaraannye nyicil, nyang gayanye nyetir juga nyicil: “yah..dikit-dikit bisa dah …”

Jakarta punye cerita. Kota ini dibandingin same Bogota nun di Kolombia. Bogota bise, Jakarta harusnye juga bise. Dulu, Bogota itu emang busuk. Kriminalitasnye nomor wahid, polusinye wahid, daerah kumuhnye ape lagi. Sampe ade “pitungnye Bogota” alias “Bang Mayor” sono nyang jadi teladan. Uswatun Hasanah (Suri tauladan nyang baek), Bang kalo kata Nabi Muhammad. Walopun Bang Mayor Bogota bukan muslim, Bang..hehe. Tapi, die teladan nyang ngegugah hati seisi kota sampe lunak, nyang bise ngajak perilaku warga buat berube, bukan tambah berabe. Die nyang punya due solusi besar: ngerube gaya hidup sama mbangun fasilitas infrastruktur nyang mencukupi.

Jakarta punya gaye. Kabarnye, ntu dua solusi besar bakal diadaptasi. Awalnye pembangunan fasilitas transportasi publik: kereta nyang pake listrik, bus nyang merah-oranye, same ape lagi ntu kapal di Ciliwung. Di Bogota, pan mereka ngebangun Trans-Bogota same Bicycle Lane di seluruh penjuru kota. Ntu due cara tadi ditambah teladan sama tegasnye Bang Mayor Bogota, masalah disono beres Bang..

Nah di Jakarta, pemerintahan Abang baru ngebangun Trans Jakarta aje kan, Bang..Jujur ni Bang, naek Bus ntu mahal, Bang..Dibandingin same nyicil same beli bengsin motor, jauh lebih mahal. Abang kagak percaya? Coba aje Abang itung ndiri. Nah, biar kagak mahal lagi Bang, solusi Bicycle Lane ntu Abang adaptasi juga dong. Banyak lagi Bang rakyat Jakarta nyang mau sepedaan. Yakin dah, Bang.. Pan mereka tau, sepedaan sehat. Ntu liat, anak buah Abang, nyang Walikota Jakarta Selatan, ntu biangnye Sepedaan die. Ane liat sepeda ontelnya aje ngiri..

Sekarang mah ye Bang, orang mau sepedaan kemane-mane dianggepnye gila. Lha kota Abang sama sekali kagak bisa dipake buat sepedaan (ntu juga paling hari minggu pas jalanan kosong plong). Ampir same Bang same nyang namanye bunuh diri, berarti kalo diliat dari sisi agamenye same aje dose. Biar dose kite nyang naik sepeda kagak nambah lagi, Abang buatin dong fasilitasnye, Bang. Kagak bakal lebih mahal Bang daripade biaya rugi nyang nimbul gara-gara Jakarta macet. Bener dah

Ni Bang, ane kasi list dah ape-ape aje nyang diperluin bakal Bicyle Lane:

1. Bicycle Lane..hehe (Cat kuning bakal ngecet lajur di trotoar, Konblok Segitiga nyang banyak).

2. Marka Jalan, kasih tande biar keliatan kalo ntu jalur buat sepeda, bukan jalur motor..

3. Tempat Penitipan / Parkiran Sepeda, yang dilengkapi dengan ruang locker dan kamar mandi. Ane denger, soal yang ini sudah ada Mall yang mau mulai. Di FX Jl. Jend. Sudirman sana kalo ane kagak salah, Bang. Harapan ane, Abang bisa ngasi anjuran untuk pengelola gedung perkantoran dan pusat perbelanjaan untuk bikin ini. Insya Allah Bang, jumlah pesepeda di Jakarta bakal terus nambah.

4. Ayo Bang, Jalur hijau dengan pepohonan yang rindang dibangkitkan lagi. Jangan takut sama pemilik bangunan yang melanggar, apalagi yang SPBU itu, Bang.. hehehe.. Hajar aja, Bang. Tegas dikit dah..

Abang Foke yang ahli nan bijaksana. Kite sama-sama tau, Abang kan lulusan Arsitektur Perencanaan Kota dan Wilayah dari negeri Jerman sono, buktiin keahlian Abang. Rakyat Jakarta nunggu kebijaksanaan Abang. Bang, baca surat ane ya, Bang…

Wassalam,

Aditya Sani

Author: Aditya Sani

I would love to encourage people to read, to think and to typewrite. Founder of Midjournal.com.

10 thoughts on “Surat buat Bang Fauzi”

  1. payah nie gubernur… ga ada giginya… ga ada gebrakan maksudnya.. anteng2 aja dy disana… masih inget dl kasus jalan jkt banyak yg rusak… dulu bbrp elemen masyarakat minta supaya jalan2 yg rusak itu dibenerin.. nyatanya sampe lama tuh jalan ga juga dibenerin… yang ada korban tewas gara2 jalan rusak terus nambah.. akhirnya bbrp org dr masyarakat mengancam akan melaporkan Bang Foke ke polisi karena kelalaian yg menyebabkan org lain luka atau tewas.. baru deh tuh jalan dibenerin pake duit alokasi umum yg notabene emg bwt keadaan darurat..

  2. iye tu.. supir2 angkotnye juga pade kaga bebudaye. masak naekin/nurunin penumpang ditenge jalen.
    kan bikin macet, ye? ye, kagak?
    apalagi kalo berentinye pas di enggok-enggokan.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s